• November 27, 2020

भद्रपुरमा कोरोना उपचार अस्पताल बनाउन सरोकारवालाको माग

 भद्रपुरमा कोरोना उपचार अस्पताल बनाउन सरोकारवालाको माग
मनपरे शेयर गरौ ! 


झापा / भद्रपुरका सरोकारवालाले यथासिघ्र कोरोना उपचार अस्पताल बनाउनु पर्ने माग गरेका छन् ।
कोरोना अस्पताल विवाद समितिले भद्रपुरमा आयोजना गरेको सरोकारवाला निकायका प्रतिनिधिसँगको सर्वपक्षीय छलफलका सहभागीले यथासिघ्र अस्पताल सञ्चालन गर्नु पर्ने माग गरेका हुन् ।

मेची अस्पताल सञ्चालनमा रहेको भवन जीर्ण र साँघुरो छ । निर्माणाधीन भवन निर्माणको चरणमा रहेकाले विकल्पका रूपमा रहेका भवन भद्रपुर १० स्थित कलवलगुरी प्रशिक्षण केन्द्रको भवन, चन्द्रगढीमा रहेको खाद्य गोदाम, निर्माणाधीन गिरिजाप्रसाद स्मृति सभा गृह, वा निर्माण सम्पन्नको चरणमा पुगेको भद्रपुर नगरपालिकाको नयाँ भवन मध्ये एक स्थानमा अस्पताल सञ्चालन गरिनु पर्ने माग गरेको हो ।

सहभागीले भद्रपुरको विकासमा स्थानीय बाधक भन्ने भ्रम फैलाएर केही विकास विरोधी तत्वहरूले अस्पताल निर्माण कार्य ओझेलमा पारेको प्रति आपत्ति जनाएका छन् । उनीहरूले अस्पताल बनिनु स्वागत योग्य भएको भए पनि भरपर्दो सुरक्षा सावधानी विना अस्पताल बनाउनु नहुने समेत प्रष्ट पारेका छन् ।

उद्योग वाणिज्य संघ झापाका अध्यक्ष नवराज पनेरूका अनुसार कोरोना संक्रमण तीव्र गतिमा देखिएको झापाका लागि भद्रपुरमै एउटा कोरोना अस्पताल छिटो भन्दा छिटो निर्माण आवश्यक छ ।

तर, छिटो अस्पताल बनाउने बाहनामा असुरक्षित भवनमा निर्माण गरिनु नहुने पनेरूको धारणा छ ।
प्रा. डा. पृथ्वीविक्रम राईले निर्माणाधीन भवनको सम्पूर्ण काम सम्पन्न गर्न महिनौ लाग्न सक्ने अवस्थामा निर्माण सम्पन्न भएका बैकल्पिक भवनहरू मध्येमा अस्पताल बनिनु पर्ने बताए ।

कोरोना अस्पताल विवाद समाधान समितिका संयोजक भक्त खवासको अध्यक्षतामा सम्पन्न छलफलमा भद्रपुर नगर क्षेत्रका रहेका विभिन्न संघ संस्था तथा सरोकारवाला निकायका प्रतिनिधिहरूको सहभागिता रहेको थियो ।

जिल्ला समन्वय समिति, प्रशासन र झापाका राजनीतिक दलहरूका प्रमुखको सिफारिसमा प्रदेश सरकारले मेची अस्पतालको निर्माणाधीन भवनमा कोरोना उपचार अस्पताल र जनस्वास्थ्य कार्यालयको तालिम भवनमा पिसिआर परीक्षण गर्ने प्रयोगशाला बनाउने तयारी गरेको थियो ।

तर, भविष्यमा प्रत्यक्ष असर पर्ने भद्रपुरका स्थानीयबासीले अस्पतालमा प्रयोगशाला र कारोना उपचार बनाउन जोखिम हुने भन्दै आपत्ति जनाउँदै सरकारी निर्णय नसच्चिए आन्दोलनमा जाने तयारी गरिसकेका छन् ।

सिमित क्षेत्रमा खुम्चिएको अञ्चल अस्पताल आसपास रक्त सञ्चार सेवा, प्रसुती गृह, पोषण पुनस्थापन केन्द्र, जिल्ला बालकल्याण संरक्षण केन्द्र, एच आइ भी उपचार तथा पुनस्थापन केन्द्र, क्षयरोग उपचार तथा पहिचान केन्द्र र अबुद्र्ध रोग पहिचान केन्द्र जस्ता सम्वेदनशील क्षेत्र ५० मिटर दुरी भित्रै पर्दछन् ।

यस्तो अवस्थामा अन्य रोगका विरामी उपचार सेवा लिन अस्पताल कसरी आउन सक्छन् ? भन्ने प्रश्न स्थानीय सरोकारवालाले जोडदार उठाएका छन् ।

मनपरे शेयर गरौ ! 

Related post