• September 28, 2020

राप्रपा हल्दिबारीद्वारा अध्यक्ष लिङदेनमाथि भएको अभद्र व्यवहारको निन्दा, सरकारको समर्थन फिर्ता लिन आग्रह

 राप्रपा हल्दिबारीद्वारा अध्यक्ष लिङदेनमाथि भएको अभद्र व्यवहारको निन्दा, सरकारको समर्थन फिर्ता लिन आग्रह
मनपरे शेयर गरौ ! 


हल्दिबारी
/ राष्ट्रिय प्रजातन्त्र पार्टी गाउँपालिका हल्दिबारी झापाले गाउँपालिकाका अध्यक्ष रविन्द्रप्रसाद लिङदेन माथि भएको अभद्र व्यवहारप्रति गम्भिर चिन्ता प्रकट गर्दै घटनाको निन्दा गरेको छ ।

आज बसेको राप्रपा हल्दिबारीको बैठकले हल्दिबारीको सातौँ गाउँसभामा आम जनताको बहुमतबाट निर्वाचित गाउँपालिका अध्यक्षलाई प्राविधिक बहुमतको बन्दी बनाउँदै अभद्र व्यवहार गरेको जनाएको छ ।

राप्रपा गाउँपालिका हल्दिबारीले गाउँसभामा भएको घटना निन्दनीय भएको भन्दै यस्तो व्यवहारले प्रणाली माथि नै दीर्घकालिन असर पुर्याउने ठहर गरेको छ ।

राप्रपा हल्दिबारीले गाउँसभामा उत्पन्न विवाद समाधान गर्नेतर्फ नेकपाको तर्फबाट छलफल र सम्वादको माध्यमबाट समस्या समाधान गर्ने सकारात्मक प्रयास नगरेको आरोप लगाएको छ ।

अर्को पक्षबाट सकारात्मक प्रयास नभएपछि लामो समयसम्म गाउँपालिकालाई अनिर्णयको बन्दी बनाएर जनताको सेवा सुविधामै प्रभाव पार्ने काम गर्नु जिम्मेवार राजनीतिक दलका लागि उपयुक्त नहुने राप्रपाको ठहर छ ।

बैठकले समस्या समाधानका लागि तत्काल कानुनी उपचारको बाटो खोज्न राप्रपाले निर्वाचित प्रतिनिधिलाई निर्देशन गरेको छ ।

साथै बैठकले हालको नेकपाले विगतदेखि नै शत्रुवत व्यवहार गर्दै आएको र जनताको बहुमतबाट निर्वाचित गाउँपालिका अध्यक्षलाई समेत बाहुबलका आधारमा विस्थापित गर्न खोजेको भन्दै सरकारलाई दिएको समर्थन फिर्ता लिन आग्रह गरेको छ ।

बैठकले अन्य कतिपय राष्ट्रिय परिस्थितिका दृष्टिले पनि सरकारललाई समर्थन कायम राखि राख्न उचित नदेखिएको जनाएको छ ।

राप्रपाले झापामा गत संसद तथा प्रदेशसभा निर्वाचनमा तत्कालिन बामपन्थी गठबन्धनसँग सहकार्य गर्दै हालको नेकपा सरकारलाई समर्थन गर्दै आएको छ ।

हल्दिबारी गाउँपालिकाको असार १० गतेको रातौँ गाउँसभामा भएको झडपपछि सिर्जित परिस्थितिलाई मध्यनजर गर्दै राप्रपा हल्दिबारीको यस्तो निर्णय आएको हो ।

बैठकले संगठन विसतार गर्न र गाउँसभामा भएको घटनाको सत्यतथ्य आम जनता र कार्यकर्ता तहमा पुर्याउन वडा र टोल स्तरीय बैठक गर्ने निर्णय गरेको छ ।

त्यसैगरि छलफल सम्वाद र निकासका लागि दिलकेशर थापाको संयोजकत्वमा देवीबहादुर थापा, एकराज रानामगर, सन्तकुमार थापा र खिवराज भट्टराई सदस्य रहने गरि एक समिति निर्माण गरेको जनाएको छ ।

मनपरे शेयर गरौ ! 

Related post