• September 23, 2020

हल्दिबारीको दोस्रो गाउँसभामा प्रस्तुत हुने रणनीति तय गर्न नेकपा संसदिय दलको बैठक सम्पन्न

 हल्दिबारीको दोस्रो गाउँसभामा प्रस्तुत हुने रणनीति तय गर्न नेकपा संसदिय दलको बैठक सम्पन्न
मनपरे शेयर गरौ ! 


हल्दिबारी / हल्दिबारी गाउँपालिकाको भोली बस्ने दोस्रो गाउँसभामा प्रस्तुत हुने रणनीति तय गर्न नेपाल कम्युनिष्ट पार्टी (नेकपा) हल्दिबारी संसदिय दलको बिस्तारित बैठक आज सम्पन्न भएको छ ।

नेकपा हल्दिबारी संसदिय दलको बैठकले असार १० गते भएको पहिलो गाउँसभाले पारित गरेको आर्थिक विधेयक र विनियोजन विधेयक प्रमाणित नभएर नागरिकले सास्ती खेप्नु परेकोले भोली बस्ने गाउँसभामा त्यसलाई प्रमाणित गराउन पहल गर्ने निर्णय गरेको नेकपा स्रोतले जनाएको छ ।

गाउँसभाको दोस्रो बैठकमा पहिलो बैठकले पारित गरेको नीति तथा कार्यक्रमलाई कडाइकासाथ प्रमाणित गराउने रणनीति तय गर्न गाउँसभा बस्ने अघिल्लो दिन बैठक बसेको स्रोतले जनाएको छ ।

गाउँपालिकालाई अनिर्णयको बन्दी हुनबाट जोगाउन समस्याको गाँठो फुकाउन भएका प्रयत्न विफल भएपछि गाउँपालिकाका बहुमत सदस्यले चाँडै गाउँसभा बैठक डाक्नु पर्ने भन्दै अध्यक्षलाई हस्ताक्षर बुझाएपछि सोमबार दोस्रो गाउँसभा हुन लागेको हो ।

नेकपा संसदिय दलका नेता डम्बरबहादुर गिरीको अध्यक्षतामा बसेको बैठकमा प्रमुख अतिथि संविधानसभा सदस्य मोहन टुडु, प्रदेश सांसद पूर्णप्रसाद राजवंशी, संसदिय दलका उपनेता राजेन्द्र योङहाङ, नेकपा गाउँपालिका अध्यक्ष याम राई र नेता सागर पोर्तेल लगायतको उपस्थिति थियो ।

गाउँपालिका अध्यक्ष रविन्द्रप्रसाद लिङदेनले जारी गतिरोध अन्त्यका लागि पहल नगरेका कारण समस्या भएकोले सुझाव दिन पार्टी संसदिय दलको बैठक डाकिएको नेकपा हल्दिबारीका अध्यक्ष याम राईले बताए ।

हल्दिबारी गाउँपालिकामा असार १० गते बसेको सातौँ गाउँसभा विथोलिएपछि गाउँपालिकाबाट पाउने नाता प्रमाणित, नागरिकताको सिफारिस जस्ता आवश्यक सेवाबाट स्थानीय डेढ महिनादेखि बन्चित हुनु परेको थियो ।

गाउँसभाबाट आर्थिक विधेयक र विनियोजन विधेयक प्रमाणिकरण नहुदा नागरिकले सास्ती खेप्नु परेको हो ।

यस अघि हल्दिबारी गाउँपालिकामा जारी गतिरोघ अन्त्यका लागि पटक पटक गाउँपालिकाका अध्यक्ष र उपाध्यक्ष बीच अनौपचारिक बैठक बसेपनि निकास निस्कन सकेको थिएन ।

हल्दिबारीको भोली बस्ने दोस्रो गाउँसभा बैठकले डेढ महिनादेखिको विवाद अन्त्य हुने अपेक्षा गरिएको छ ।

दोस्रो गाउँसभा बस्नु अघि अध्यक्ष लिङदेन र उपाध्यक्ष गिरी बीच गतिरोध अन्त्यका लागि छलफल गरि सहमति भइसकेको प्रवत्ता सागर पोर्तेलले जानकारी दिए ।

मनपरे शेयर गरौ ! 

Related post