कतार पछि नेपालमा ‘मन त परदेशी’

फिल्मी संसार मनोरञ्जन

काठमाडौं / रोजगारीको लागि खाडी मुलुक पुग्दा नेपाली युवाहरुले झेल्ने र झेल्दै आएका पीडाहरुलाई उठान गर्दै निर्माण गरिएको फिल्म ‘मन त परदेशी’ प्रदर्शनका लागि तयार भएको छ ।

फिल्म युनिटले बुधबार राजधानीमा पत्रकारमाझ फिल्मलाई कतार पछि नेपालमा प्रदर्शन गर्न लागिएको जानकारी दियो ।
फिल्मका निर्माता दुर्गाबहादुर खड्काले कतारमा आफू बस्दा नेपालीले भोगेको पीडालाई देखेकाले त्यही विषयलाई फिल्ममा प्रस्तुत गरिएको बताए । ‘देश छोडेर रोजगारीका लागि विदेशमा जाँदा त्यहाँका नेपालीले भोग्ने अनेक समस्यालाई फिल्ममा देखाएका छौं,’निर्माता खड्काले भने,‘केही समय अघि कतारमा हामीले फिल्म देखाउँदा राम्रो प्रतिक्रिया पायौं । यो फिल्म हेरिरहँदा दर्शकले आफ्नै कथा हेरेको महशुस गर्नुहुनेछ ।’

नायक दीपेशराज पाण्डेले फिल्ममा हरेक नेपालीको कथा रहेको बताए । ‘आफ्नो गाउँ छोडेर मानिसहरु किन विदेसिन्छन् भन्ने विषयलाई फिल्ममा उठान गरिएको छ ।’ उनले भने । नायिका समिता गिरीले आफूले गाउँले प्रेमिकाको भूमिकामा अभिनय गरेको खुलाइन् ।
फिल्मका निर्देशक देव नेपाल हुन् । फिल्ममा दिपेशराज पाण्डे, समिता गिरी, विक्रम क्षेत्री, रेनु शर्मा, रमिला आचार्य, किशोर खतिवडा, राम बुढाथोकी, रमेश, जोन्नीलगायतका कलाकार को अभिनय छ ।

दुर्गाबहादुर खड्का र भुवन शर्मा कँडेलले निर्माण गरेको फिल्ममा पुश्कर सुनुवारको संगीत तथा  मरुभूमि नारायण र राजेन्द्रकुमार थापाको छायांकन छ । नागरिक न्यूज