पर्यटनमन्त्री अधिकारीको अन्त्येष्टि गृह जिल्लामा

कास्की /कास्की क्षेत्र नं २ बाट संघीय संसदका लागि निर्वाचित संस्कृति, पर्यटन तथा नागरिक उड्डयनमन्त्री रवीन्द्र अधिकारीको अन्त्येष्टि गृह जिल्ला कास्कीमा गरिने भएको छ ।

शव शुक्रबार बिहान ८ बजेदेखि पोखरा प्रदर्शनी केन्द्रमा अन्तिम श्रद्धाञ्जलीका लागि राख्ने तयारी भइरहेको उनका स्वकीय सचिव राजेन्द्र आचार्यले जानकारी दिए ।

पोखरा-३३ भरतपोखरीको जामुनाबोटमा जन्मिएका मन्त्री अधिकारीको बुधबार ताप्लेजुङमा हेलिकप्टर दुर्घटनामा परी निधन भएको थियो ।

स्वकीय सचिव आचार्यका अनुसार अधिकारीको शव काठमाडौं ल्याइएपछि त्रिवि शिक्षण अस्पतालमा शव परीक्षण गरिनेछ । त्यसपछि नेकपाको केन्द्रीय कार्यालयमा पार्टीको झण्डा ओढाउने र केहीबेर श्रद्धाञ्जलिका लागि राखिने छ ।

गृहमन्त्रालयले निर्णय गरेपछि काठमाडौं खुलामञ्चमा सम्मानका लागि लगिनेछ । अधिकारीको राजकीय सम्मानका साथ अन्त्येष्टि गर्ने मन्त्रिपरिषद्ले बुधबार निर्णय गरिसकेको छ ।

बिहीबार बेलुकासम्म अधिकारीको शव पोखरा लाने तयारी गरिएको छ । शुक्रबार बिहान ८ बजेदेखि अन्तिम श्रद्धाञ्जलिका लागि राखी त्यसपछि अन्त्येष्टि गरिने बताइएको छ ।