पूर्वका चिया मजदुर एकैसाथ आन्दोलित

झापा / पूर्वका चिया बगान तथा कारखानामा कार्यरत मजदुर सरकारले तोकेको न्यूनतम ज्याला नपाएको भन्दै आजदेखि आन्दोलित भएका छन् ।

चिया मजदुरले श्रमिकका लागि तोकिएको न्यूनतम ज्याला नपाएको भन्दै चरणबद्ध आन्दोलन शुरु गरेका हुन ।

नेपाल चिया बगान श्रमिक सङ्घ, नेपाल कृषि तथा बगान क्षेत्र श्रमिक सङ्घ र अखिल नेपाल चिया मजदूर सङ्घले संयुक्तरूपमा आर्थिक वर्ष २०७५/७६ साउनदेखि तोकिएको न्यूनतम ज्याला पाउनुपर्ने माग राखेर आन्दोलन थालेको चिया मजदूर नेता दीपक तामाङले बताए ।

पारिश्रमिक विवाद समाधान नभएपछि झापा, इलाम, धनकुटा, पाँचथर र तेह्रथुममका चिया बगान तथा कारखाना मजदूर एकैसाथ आन्दोलित बनेका छन् ।

झापाका चिया मजदुरले आज सबै चिया प्रतिष्ठानमा अनिश्चितकालीन तालाबन्दीसहित चन्द्रगढीमा विरोधसभा गरेका छन् ।

‘श्रम ऐन लागू गर, राजपत्रमा उल्लेखित न्यूनतम पारिश्रमिक कार्यान्वयन गर’लगायत नारा लेखिएका ब्यानरसहित निस्किएको ¥याली जिल्ला प्रशासन कार्यालय हुँदै चन्द्रगढी बजार परिक्रमा गरी ट्रेड युनियन चोकमा कोणसभामा परिणत भएको थियो ।

कोणसभामा नेपाल चिया बगान श्रमिक सङ्घका अध्यक्ष दीपक तामाङले चिया बगान र कारखानाका मालिकले नेपाल सरकारको राजपत्रमा उल्लेखित पारिश्रमिक कार्यान्वयनमा चासो नदिएकाले आन्दोलित हुनुपरेको बताए ।

सरकारले तोकेको न्यूनतम ज्यालाबमोजिम चिया बगानमा कार्यरत श्रमिकले पारिश्रमिक दैनिक रु २३१ तथा महङ्गी भत्ता रु १५४ पाउनुपर्ने हुन्छ । सो ज्याला नपाएपछि चिया मजदूर पुनःआन्दोलित बनेका हुन् ।

अखिल नेपाल चिया मजदूर सङ्गठनका केन्द्रीय अध्यक्ष सीता सापकोटाले मजदूर र बगान मालिकबीच पटकपटक गरिएको वार्ता र छलफल निष्कर्षविहीन भएपछि बन्द हड्तालमा उत्रनु परेको बताइन् ।

मजदूरले यही चैत १८ गते आफू कार्यरत बगानमा औजारसहित बृहत् जुलुश प्रदर्शन गर्ने, १९ गते विर्तामोडमा तथा २१ गते काँकडभिट्टामा विरोधसभा गर्ने कार्यक्रम रहेको बताइएको छ ।